Атырау тұрғыны полицияға хабарласып, адам өлтіргенін мойындады
Алайда оның жалған хабар бергені анықталды
Атырау тұрғыны полицияға хабарласып, адам өлтіргенін мойындаған. Алайда оның жалған ақпарат бергені анықталды, деп хабарлайды Azattyq Rýhy.
Атырау облыстық полиция департаментінің мәліметінше, 1 ақпан күні сағат 12.18-де «102» нөміріне белгісіз ер адам хабарласып, «Авангард» шағынауданындағы үйлердің бірінде адам өлтіріп қойғанын айтқан.
«Тексеру кезінде 33 жастағы ер адамның ақпараты жалған екені анықталды. Наркологиялық сараптама оның алкогольдік масаң күйде болғанын көрсетті. Ер адам өз кінәсін мойындап, мұндай әрекетке мас күйде болғандықтан барғанын түсіндірді», - делінген ПД хабарламасында.
Қазіргі уақытта оған қатысты ҚР ӘҚБтК-нің 438-бабы «Арнайы қызметтерді көрінеу жалған шақыру» бойынша әкімшілік хаттама толтырылып, 91 890 теңге айыппұл салынды.
Айта кетсек, 2021 жылы полицияға жалған хабар бергені үшін 60-қа жуық адам, 2022 жылдың басынан бері үш адам жауапқа тартылған.
