Таразда бүлдіршінді ұрып құлатқан ер адам жайлы полиция түсініктеме берді

Полиция Таразда баланы аяусыз ұрған ер адам туралы айтты, деп хабарлайды Azattyq Rýhy.

«20 қазанда Тараз полициясына Абай даңғылындағы «Инвиво» медициналық клиникасының жанында кәмелетке толмаған баласына дене жарақатын салған белгісіз адамның үстінен арыз түсті», - делінген хабарламада.

Аталған факті бойынша ҚР ҚК 293-бабы 1-бөлігі (бұзақылық) бойынша сотқа дейінгі тергеу басталды. Тәртіп сақшылары Жамбыл ауданының тұрғынын анықтап, полицияға жеткізді.

Тергеу барысында күдіктінің психикалық аурумен ауыратыны және облыстық психиатриялық ауруханада есепте тұрғаны анықталды. Кәмелетке толмаған балаға қатысты сот-медициналық сараптама тағайындалды.

Күдікті одан әрі сот-психиатриялық сараптама тағайындау үшін психиатриялық ауруханаға жатқызылды.

Еске сала кетейік, Таразда ер адам көшеде ойнап жүрген бүлдіршінді ұрып құлатқан болатын. Оқиға бақылау камераларына түсіп қалды. Онда ер адамның ойнап жүрген баланы қалай ұрғанын көруге болады. Соққының салдарынан бала асфальтқа шалқасынан құлады. Орнынан тұрмақ болған баланы тебуге тырысты.