Қарағанды облысында автобус жүргізушілері он шақты күнде 1400-ден астам жол ережесін бұзды
Рульде отырып, телефонмен сөйлескен 205 жүргізуші жауапқа тартылды
Қарағанды облысында жүргізушілер тарапынан 1424 заң бұзушылық анықталды, деп хабарлайды Polisia.kz.
Қарағанды облысында «Автобус» республикалық жедел-профилактикалық іс-шарасының қорытындысы шығарылды. Өткізу кезеңінде – 4-13 қазан аралығында қоғамдық көліктің жүргізушілері 1424 жол қозғалысы ережесін бұзғанын анықтады.
Осылайша, маневр жасау ережесін бұзғаны үшін 221 жүргізуші, көлік жүргізу кезінде телефонды пайдаланғаны үшін 205 жүргізуші, міндетті техникалық тексеруден өтпегені үшін 65 жүргізуші әкімшілік жауапкершілікке тартылды.
Сонымен қатар, автокөлік тұрағына 19 бірлік көлік орнатылды, 30-ынан мемлекеттік тіркеу нөмірлері алынды. Автобус қоймаларының 18 басшысы жауапқа тартылды. Барлығы қысқы маусымның басына дейін 615 автобустың жылу мен электр жабдықтарының жай-күйіне сәйкестігі тексерілді.
