Павлодардағы мектептердің бірінде өрт болды

Павлодардағы мектептердің бірінде өрт болды. Бүгін облыс орталығындағы № 7 жалпы білім беру орта мектебінің жертөлесінде алаңы 6 шаршы метрді құрайтын өрт болды, деп хабарлайды Pavlodarnews.kz.  

Павлодар облыстық төтенше жағдайлар департаментінің хабарлауынша, өрттен зардап шеккендер жоқ.

«Бүгін кешкі сағат 17-22-де "101" пультіне Павлодар қаласы, Жеңіс алаңы көшесі, 13 мекенжайы бойынша өрт туралы хабарлама келіп түсті. Аталған мекенжайда Павлодар қаласының № 7 жалпы білім беру орта мектебі орналасқан. Бес қабатты ғимаратта жертөлесінде алаңы 6 шаршы метрді құраған өрт орын алды. Өрт дәнекерлеу кезіндегі өрт қағидасын сақтамаудың салдарынан орын алған», - деді Павлодар қаласы ТЖ басқармасы басшысының орынбасары Тілекжан Галямов.

Өртті сөндіруге Павлодар облысы ТЖД жеке құрамынан 29 адам және 9  техника, сынақ өрт зертханасы, АМО, "102" қызметі шықты. Тілсіз жау 17:47-де толықтай сөндірілді.