Түркістан облысында жүк көліктері соқтығысып, үш адам қаза тапты

Оқиғаның мән-жайы анықталып жатыр

Түркістан облысында ауыр жүк көліктерінің қатысуымен жол-көлік оқиғасы болып, үш адам қаза тапты деп хабарлайды Polisia.kz.

19 қыркүйек шамамен сағат таңғы 05.50-де Сауран АПБ-ға ауыр жүк көліктерінің қатысуымен жол-көлік оқиғасы бойынша хабарлама келіп түскен. Сауран АПБ полицейлері аталған жайтты бірден ҚР ҚК-нің 345-бабы 4-бөлігімен (Көлiк құралдарын басқаратын адамдардың жол жүрісі немесе көлiк құралдарын пайдалану қағидаларын бұзуы) бойынша тіркеп, оқиға орнына жедел жетті. 

Анықталғандай, Шымкент-Самара трассасының 135-шақырымында DAF 460 маркалы көлігінің жүргізушісі Шымкент қаласынан Түркістан бағытына қарай басқарып келе жатып, жолдың жиегінде тоқтап тұрған келесі бір DAF 105 маркалы жүк көлігін қағып кетіп, жол-көлік оқиғасын жасаған.

Нәтижесінде, тоқтап тұрған ауыр жүк көлігінің жанында болған үш адам оқиға орнында қаза тапты. DAF 460 маркалы көлігінің жүргізушісі қамауға алынды. Бүгінгі таңда бұл жайтқа байланысты тиісті сараптамалар тағайындалды. Оқиғаның толық мән-жайы анықталу үстінде.

×
Бұл желілік ресурстың ақпараттық өнімдері 18 жастан асқан адамдарға арналған.