Оралда такси жүргізушісі студент қызды зорлаған

Орал қаласында inDriver қосымшасы арқылы келген такси жүргізушісі танысымен бірге студент қызды зорлап кетті, деп хабарлайды Azattyq Rýhy тілшісі.

Қоғам белсендісі, блогер Александр Цойдың хабарлауынша, 7 тамыз күні Орал қаласындағы колледждердің бірінде оқитын 3-курс студенті қыз құрбысының үйіне қонаққа барған. Кешке inDriver қосымшасы арқылы такси шақырып, көп ұзамай келген көлікке отырады.

«Келген көліктің ішінде тағы бір ер адам отырды. Мен оны жолаушы деп ойладым, ештеңеге алаңдамай көлікке отырдым», - деп жазды блогер жәбірленушінің атынан.

Алайда, біраз уақыттан кейін жүргізуші бағытын бірден өзгертіп, есіктерді жауып, қала сыртына бет алған. Жүргізуші адам жоқ жерге тоқтап, сыртқа шыққан сәтте көліктегі жолаушы қызға тап береді.

«Ол мен қарсыласпас үшін ұрып-соғып, тұншықтыра бастады, көмектесетін ешкім болмады. Содан кейін зорлады», - делінген жазбада.

Кейін қызға такси жүргізушісі зорлық жасаған. Сондай-ақ, қос күдікті зардап шеккен бойжеткенді құс фабрикасы ауданындағы үйге апарып, түні бойы зорлаған. Таңға жақын есі кіресілі-шығасылы қызды үйіне әкеліп тастайды.

Жәбірленуші бірден полиция шақырады. Сол күні-ақ телефон нөмірлері бойынша зорлаушылардың жеке басы анықталып, полицияға жеткізілген. Алғашқы жауап алу кезінде олар өз әрекетін мойындаған. Оларға адам ұрлығы, заңсыз бас бостандығынан айыру, ерекше қатыгездікпен жасалған және кісі өлтіру қаупімен байланысты бірнеше рет топтық зорлау фактісі бойынша айып тағылды.

Блогердің жазуынша, Орал қаласы полиция департаментінің қызметкерлері күдіктілерді қолхатпен босатып жіберген. 

«Бір қызығы, оралдық тергеуші күдіктілерге куәгер статусын беріп, ешқайда шықпайтындары туралы қолхатпен бостандыққа жіберген. Қайталап айтамын, адам ұрлаушы зорлықшылар іс бойынша куәгер деп танылуда. Неге бірден жәбірленуші бола салмады?! Айтпақшы, ол inDriver-де жұмыс істеп, бәрін жоспарлы түрде жасаған», - дейді блогер.

Аталған іске байланысты мән жайды білу үшін редакция Орал қаласы Полиция департаментіне хабарласты. Баспасөз қызметі бұл іс бойынша әзірге пікір білдіре алмайтындарын мәлімдеді.

«Аталған іс бойынша экспертиза тағайындалады. Қосымша ақпарат хабарланады»,- деді ПД баспасөз қызметі.