Жалған ПТР-тестін жасап сатқан екі оралдық бозбала ұсталды

Батыс Қазақстан облысында полиция қызметкерлері медициналық құжаттарды қолдан жасаудың қылмыстық схемасын, атап айтқанда, COVID-ке ПТР-тест нәтижелерін және РФ медициналық мекемелерінен шақыру анықтамаларын жасаған екі адамды ұстады, деп хабарлайды Azattyq Rýhy тілшісі облыстық полиция департаментінің баспасөз қызметіне сілтеме жасап.

«Криминалдық полиция басқармасы жедел-іздестіру іс-шараларын жүргізу барысында Орал қаласының тұрғындары 2002 жылы туған П. және А. азаматтарын ұстады. Олар ПТР-тестін сканерлеп алып, анкеталық мәліметтерді өзгерту арқылы жаңа ПТР-тесттерін жасаумен айналысқан. Сондай-ақ, «кәсіпкерлер» Ресей Федерациясында орналасқан медициналық мекеменің мемлекеттік шекараны кедергісіз кесіп өту үшін шақыруларын жасап сатқан», - деді полиция.

Тінту іс-шараларын жүргізу барысында және жеке тексеру кезінде айыпталушылардан олардың қылмыстық қызметін растайтын тиісті құжаттар, ноутбук және белгілі сомадағы қаражат тәркіленді.

Аталған факті бойынша ҚР Қылмыстық кодексінің 385-бабы бойынша сотқа дейінгі тергеу басталды.