Мәйіттер ауысып кеткен: Өз әкесінің орнына басқаны жерлей жаздады

Елордада көпсалалы медицина орталығындағы қателіктің кесірінен қайғыда жүрген балалары өз әкесінің орнына басқа біреудің денесін жерлей жаздады. Медицина мекемесінің қызметкерлері марқұмның мәйітін басқа біреумен шатастырып, Таразға ұшақпен салып жіберген, деп хабарлайды Azattyq Rýhy КТК телеарнасы сілтеме жасап. 

"Ашсақ, басқа бір адам жатыр. Інісі болған, сол көрді. Екі баласы көрді. Мен көрдім, ол емес боп шықты. Бейнесі біраз ұқсайды. Ал енді әкеміз қайда десек, олар айтпайды. «Жоқ, осы» дейді. Өзіне әкеп бұрынғы суретпен салыстырдық, міне, мына адам, мынандай болатын дедік. Анада мең бар, мынада мең жоқ дегеннен кейін бұлар қипылықтай бастады. Таразға салып жіберген екен", - деді марқұмның туысы Кәкен Жантайұлы. 

Бүгін таңертең Таразға кетіп қалған марқұмның денесі түс ауа ұшақпен елордаға қайта жеткізілді. Әкелген бойда балалары мен туыстары әуежайдан көлікке салып жерлеуге алып кетті. Айтуларынша, жетпіс жастағы кісі екі апта бойы коронавируспен ауырып, ақыры беті бері қарамай о дүниеге аттанған. 

Дәрігерлер жағдайды былай баяндайды: екі мәйіт кеше инфекциялық ауруханадан жеткізілген. Кеше кешке марқұмдардың бірінің баласы келіп, 63 жастағы әкесін танып, Таразға әкететін болған. Сол тәртіппен бүгін таңертең мәйіт Таразға жіберілген. Алайда Таразда жерленуі тиіс болған кісінің баласы жағдайды басқаша түсіндірді. Айтуынша, кеше өзі келіп әкесінің денесі қайсы екенін көрсетіп кеткен. Осы былықтың кесірінен өз әкесінің денесі Таразға бүгін кешке жеткізілейін деп тұр. Сондықтан дәрігерлерді салғырттығы үшін сотқа беруге бекінген. Ақ халаттылар кінәсін мойындап, марқұмдардың туыстарынан кешірім сұрады. Сондай-ақ шатасқан мәйітті Тараздан қайтарып әкелу шығынын да өз қалтасынан төлеген. 

"Зертханашы мәйіттің бетін ашып көрсетіп сұраған баласынан: «Сіздің әкеңіз бе?» деп сұраған. Ол: «Иә, менің әкем» деген. Одан кейін рәсім қызметімен бірге келді дейді. Мырыш табытқа салып алып кетті дейді. Одан кейін екінші мәйітке баласы таңертең келген. Олар ашып қараған кезде мәйіт бөтен болып шыққан. Сол екеуінің орны ауысып кеткен", - деді Нұр-Сұлтан қаласы көпсалалы медицина орталығы директорының емдеу жұмысы жөніндегі орынбасары Бақтыбай Оразбеков.