ШұғылҚазақстанда тағы 716 адамнан коронавирус анықталды

Балабақшада үстіне ыстық сорпа төгілген: ақтаулық ана білім басқармасымен соттасып жатыр

Оқыс жағдай наурыз айында Ақтаудағы балабақшалардың бірінде болған

Ақтауда балабақшада күйіп қалған жеті жасар қыздың анасы қалалық білім басқармасымен соттасып жатыр. Ол баласының үстіне ыстық сорпа төгіп алған мектепке дейінгі мекеменің қызметкерлері тиісті жазасын алмай, жайбарақат жүргеніне наразы. Жәбірленуші тарап денесінің жартысын күйік шалған Каринаның еміне кеткен қаражатты балабақшадан өндіріп алмақшы, деп хабарлайды Azattyq Rýhy КТК арнасына сілтеме жасап.

Оқыс жағдай наурыз айында Ақтаудағы балабақшалардың бірінде болған. Жеті жасар Каринаның оңбай күйген сәті бейнебақылау камерасына жазылған. Кадрлерден ас бөлмеге жүгіріп кірген қыздың үстіне күтуші әйелдің ыстық сорпаны төгіп алғаны көрінеді. Соның салдарынан бүлдіршіннің денесін 30 пайыз күйік шалған. Терісі тартылып, әбден қиналған Каринаның сол кездегі жағдайы жүрек сыздатарлық.

Алғашында Каринаның жүріп-тұруы да мұң болыпты. Анасы жұмысына салғырт қараған балабақша қызметкерлерін кінәлап отыр. «Мектепке дейінгі мекемеде балалардың қауіпсіздігі мүлдем сақталмаған» дейді ол.  

«Біз барғанда баланың үсті-басы сорпа болды. Ешкім жедел жәрдем шақырмаған. Киімдерін бірден шешкені ақылға қонымсыз. Алғашқы медициналық көмек мүлдем көрсетілмеген. Қызым жанұшыра айғайлап жатса да, тәрбиеші алаңсыз жүр. Өйткені, ол саңырау екен. Жасы 72-де. Мұндай адамды қалай жұмысқа алуға болады?», – дейді Каринаның анасы Сәния Есқалиева.

Баласын уайымдаған ана тоғыз айдан бері талай аурухана табалдырығын тоздырыпты. Алайда, Ақтаудан білікті маман тапағанын айтады. Кейін қызын Нұр-Сұлтан қаласына апарып, бірнеше рет ота жасатқан. Қазір қыздың жағдайы қалыпты. Бірақ денесінде күйіктің іздері әлі бар. Қызының қиналғанын еске алған ана көзіне еріксіз жас алды.

«Қызыма 40 екпе салды. Қиналғанын көріп, жанымды қоярға жер таппадым. Балабақша директоры бір ай өткен соң бізді ұмытып та кетті. Қызым әлі өз-өзіне келген жоқ. Әбден шошып қалған. Бұл жағдай басқаларға да сабақ болуы тиіс», – деп ашынады Сәния Есқалиева.

Қалалық білім басқармасындағылар балабақшаның бірқатар қызметкерін жұмыстан шығарғанын айтады. Ал баланың ем-домына мектепке дейінгі мекеменің ұжымы 600 мың теңге жинап беріпті.

«Осы жағдайдан кейін біз балабақшада қызметтік тексеріс жүргіздік. Тәрбиеші мен директордан түсініктеме алдық. Аталған балабақшаның тәрбиешісі, оның көмекшісі мен медбике жұмыстан босатылды», – деді Ақтау қалалық білім басқармасының бөлім басшысы Ақмарал Байшаханова.

Алайда, Сәния қалалық білім басқармасын сотқа берген. Оқиғаға қатысты алғашқы сот процесі де басталды. Каринаның анасы кінәлілер тиісті жазасын алмайынша, соңына дейін күресемін деп отыр. Қыздың еміне кеткен қаражатты ол толық көлемде өндіріп алмақшы.