Павлодарда кәмелетке толмаған қызды 4 жыл бойы зорлаған педофилге қатысты сот үкімі шықты

Павлодар облысының қылмыстық істер жөніндегі мамандандырылған ауданаралық соты алқабилердің қатысуымен жас баланы бірнеше рет зорлау, кәмелетке толмағандарға қатысты сексуалдық сипаттағы зорлық-зомбылық әрекеттерін жасау және зорлау, қару, есірткі заттарын заңсыз сақтау фактілері бойынша қылмыстық істі қарады.

Сот анықтағандай, Ж. 2016 жылдың 24 наурызынан бастап 2020 жылдың 4 қаңтарына дейін жас баланы бірнеше рет зорлап, сонымен қатар кәмелетке толмаған үш балаға қатысты сексуалдық сипаттағы зорлық-зомбылық әрекеттерін жасаған және зорлаған.

Ж.-ны тінту кезінде гаражда кесілген мылтық, тұрғылықты жерінен есірткі табылды.

Алқабилердің бірауыз кесімімен тағылған айыптаудың барлық эпизодтары бойынша Ж.-ның кінәлілігі туралы шешім қабылданды және өмір бойына бас бостандығынан айыру түріндегі жаза тағайындалды.