Балықтардың қырылуына байланысты Талдыкөл су айдыны тексеріліп жатыр

Қызылорда облыстық орман шаруашылығы және жануарлар әлемі аумақтық инспекциясынан балықтардың қырылуы туралы ақпарат түсуіне байланысты Талдыкөл су айдынындағы екі нүктеден су сынамасын алды. Жоспардан тыс тексеру 7 қаңтар күні «Қазгидромет» РМК Қызылорда облыстық Экология департаментімен бірге жүргізілді. 

"Су сапасының сараптамасы 30 физикалық-химиялық көрсеткіштер бойынша (басты иондар, биогенді, органикалық және органикалық емес заттар, ауыр металдар және т.б.) жүргізіледі. 
Алғашқы күнгі сараптаманың қорытындысы бойынша, су температурасы 1,8–3,1ºC аралығын көрсетті, сутек көрсеткіші 7,6-7,7, судың тұнықтығы - 21см, түстілігі – 6-8 градус, иісі – 0 балл болды. Табиғи суға тән емес иіс табылған жоқ. Суда ерітілген оттегі концентрациясы төмен екені анықталып, 1,6-3,0 мг/дм3 –ты көрсетті. Оның көлемі 4 мг/дм3-тан жоғары болғанда нормаға сай деп есептеледі", - делінген хабарламада. 

Қазіргі уақытта су сынамасының сараптамасы басқа да көрсеткіштер бойынша жалғасып жатыр. Оның қорытындылары туралы қосымша хабарланады.