Жолаушылардың болмауынан Көкшетау – Алматы бағытындағы әуе рейсі орындалмай қалды

Ақмола облысы коронавирустың таралу қаупі бойынша «қызыл» аймақтан шықты. Осыған сәйкес, өңірде бірқатар аймаққа қатынайтын жолаушылар тасымалын қайта іске қосу жайы қарастырылып жатыр. Бұл туралы өңірлік коммуникациялар қызметінде өткен брифингте облыстық Жолаушылар көлігі және автомобиль жолдары басқармасының басшысының орынбасары Александр Рублевский мәлім етті.

Ведомство өкілінің айтуынша, егер санитарлық бекеттер алынып, карантин талаптары жеңілдетілсе, автобустардың қозғалысы қайта жандана бастайды.

«Егер күшейтілген карантин талаптары жеңілдетілсе, қаладан шығатын жолдарда санитарлық бекеттер алынса, Көкшетау және Степногорск қалаларына қатынайтын автобустар қайта жүреді. Сонымен қатар, Азаматтық авиация комитеті 8 желтоқсаннан бастап Көкшетау – Алматы, Көкшетау – Ақтау бағытындағы әуе рейстерін қайта іске қосу туралы шешім қабылдаған. Алайда жолаушылардың болмауына байланысты Алматы бағытындағы алғашқы рейстің ұшуы кейінге қалдырылды. Алдағы уақытта жолаушылар тарапынан сұраныс болып жатса, қайта жүзеге асырылады», – деді Александр Рублевский.

Естеріңізге сала кетсек, өңірде 5 қарашадан бастап Көкшетаудан Алматы мен Ақтау қалаларына қатынайтын әуе рейстерін орындауға тыйым салынды. Қарашаның соңында облыстың бас санитар Айнагүл Мусинаның қаулысына сәйкес, Көкшетау – Степногорск бағытындағы автобустардың да қатынасы тоқталы. Ал, жолаушылар пойызы бұрынғы бекітілген кесте бойынша 12 қарашадан бастап Көкшетау –Қызылорда және Петропавл – Алматы бағытындағы пойыздар екі күнде бір рет жүре бастады. Жолаушыларды отырғызу тек 1,2 және 3 класты вокзалдар орналасқан станцияларда ғана жүзеге асырылуда.

Абзал Алпысбайұлы, Ақмола облысы