Нұр-Сұлтанда тағы да газ баллоны жарылып, өрт шықты
Өрт сөндірушілер асханадан 4 газ баллонын алып шықты
![Нұр-Сұлтанда тағы да газ баллоны жарылып, өрт шықты](https://azattyq-ruhy.kz/cache/imagine/main_page_full/uploads/news/2020/12/02/5fc6d2cc9cf93925254812.jpeg)
Нұр-Сұлтан қаласында құрылыс аумағындағы асхана ретінде жабдықталған контейнер өртенді. Онда газ баллоны жарылған, деп хабарлайды қалалық ТЖД баспасөз қызметі.
«1 желтоқсан күні сағат 22:14-те елорданың ТЖД Өрт сөндіру бөлімшесіне А.Байтұрсынов көшесіндегі 43/2-үйде өрт шыққаны туралы хабар келіп түсті. Өрт сөндірушілер 5 минуттан кейін сонда жетті. Олар жаңа құрылыс аумағында шамамен 150 шаршы метр аумақта асхана ретінде жабдықталған контейнер жанып жатқанын анықтады. Сондай-ақ, асхана жанындағы ағаш құрылғылар да өртене бастаған», - делінген ТЖД хабарламасында.
Алдын ала болжам бойынша газ баллоны жарылған. Өрт сөндірушілер асханадан 4 газ баллонын алып шықты. Өрт сағат 22.36-да ауыздықталып, сағат 22-50-де толық сөндірілді. Мамандар өрттің шығу себебі анықтауға кірісті. Өртті сөндіруге 4 техника және жеке құрамнан 23 адам жұмыс істеді.