Хромтаудағы газ жарылысы: 3 адам жансақтау бөлімінде жатыр

Ақтөбе облысында газ баллоны жарылып, 9 адам ауруханаға жеткізілген. Күйіп қалғандардың арасында 10 жастағы қыз бала бар. Тағы үш адам жансақтау бөлімінде жатыр. Қирап қалған баспана табиғи көгілдір отынға қосылса да, үй иелері неге екені белгісіз, газ баллонын пайдаланбақ болған, деп хабарлайды Azattyq Rýhy «Астана» телеарнасына сілтеме жасап.

Жарылыстың қатты болғаны соншалық, баспананың қабырғасы қирап, шатыры ортасына түсіпті. Жарылыс кезінде үй ішінде қонаққа келіп жатқан туыстары да болған. Үйдегі 9 адамның барлығы дереу ауруханаға жөнелтілген. Арасында жаңа туған шақалақ та бар. Өміріне қауіп жоқ деген екі бала мен екі ересек адамды дәрігерлер үйге босатыпты. Қалғаны қазір аурухана төсегіне таңылған.  

«Үш адам жансақтау бөлімінде жатыр. Он жасар баланың денесі жараланған, аяқ-қолының 35-45 пайызын күйік шалған. Ең үлкені – 63 жылғы азамат. Оның денесінің 80 пайызы күйген. Кеше біз саанавиациямен арнайы мамандар жібердік», - деді Ақтөбе облыстық Денсаулық сақтау басқармасының басшысы Рустем ИСАЕВ.

Жансақтау бөлімінде жатқан үшінші адам – 20 жастағы жігіт, оның денесінің 45 пайызы күйіп қалған. Дәрігерлер оның жағдайын тұрақты деп бағалады. Дегенмен ертең науқастарды облыс орталығындағы ауруханаға апаруды жоспарлап отыр.

Төтенше жағдай мамандары үйде сыйымдылығы 5 литрлік газ баллонының жарылғанын айтады. Ал оған не себеп болғанын анықтауға кірісті.

«Болжам бойынша өрттің шығу себебі – газ баллонының жарылуы. Ол газ баллон үйдің ішінде болған, бұл – өрт қауіпсіздігі ережелерінің бұзылуы болып саналады. Далада күн салқын, суықтан жылы үйге бірден кіргізгендіктен, газ қысымы артып кеткен болуы мүмкін», - деді Ақтөбе облыстық ТЖД өрт қауіпсіздігін бақылау басқармасы басшысының орынбасары Нұрхат ҚАЛДЫБАЕВ.

Айта кету керек, жер үйге табиғи көгілдір отын тартылған екен. Жарылысқа себеп болған бес литрлік газ баллонының үйге неге әкелінгені әзірге белгісіз. Оны құзырлы орган мамандары анықтауға кірісті. Көршілердің айтуынша, бұл үйге жас отбасы былтыр ғана қоныстаныпты. Тірнектеп жиған-тергеніне баспана тұрғызғанымен, қазіргі таңда қиын жағдайда қалған отбасыға көмектесу үшін еріктілер әлеуметтік желі арқылы қаражат жинауды бастап кетті.