Ақмолада көлік ұрлаған жігіт жол апатынан көз жұмды

Бурабай ауданының Қарабауыр ауылында белгісіз біреулер «Volkswagen Golf 3» маркалы автокөлігін ұрлап кеткен, деп хабарлайды Azattyq Rýhy тілшісі Ақмола облысының полиция департаментінің баспасөз қызметіне сілтеме жасап.

Аталған факт бойынша сот-медициналық сараптамасы тағайындалған.

Қарабауыр ауылының 48 жастағы тұрғыны осы жылдың 9 қарашасында Бурабай аудандық полиция бөліміне көлігінің ұрлап кеткені туралы келіп арызданған.

«Аудандық полиция бөліміне келген Қарабауыр ауылының тұрғыны түн ішінде көлігін біреулердің жымқырып кеткенін хабарлаған. Дереу жедел-іздестіру шаралары ұйымдастырылып, осы ауылдың 22 жастағы тұрғыны ұсталды. Ол автокөлікпен Абылайхан ауылы бағытында «Дорофеевка-Зеленый Бор» бойындағы жолда Қызылағаш ауылына таман тұста рөлге ие болмай көлікті аударып тастаған. Полиция жол жиегіне аударылып түскен көлікті іздеп тапты. Жол апаты салдарынан көлікті ұрлап кеткен жігіт оқиға орнында көз жұмыпты. Аталған факт бойынша Қазақстан Республикасы Қылмыстық кодексінің 200-бабы 1-тармағы, «Автомобильді немесе өзге де көлік құралдарын ұрлау мақсатынсыз заңсыз иелену» бойынша сотқа дейінгі тергеу амалдары басталды.

Полиция қызметкерлері аталған қылмыстық іс бойынша барлық фактілерді назарға алатын болады», - дейді Ақмола облысы полиция департаментінің баспасөз хатшысы Гүлнәр Пинчук.

Қазіргі уақытта полиция қызметкерлері Қылмыстық кодекстің 345-бабының 3-бөлігі,  яғни«Көлік құралдарын басқаратын адамдардың жол қозғалысы немесе көлік құралдарын пайдалану ережелерін бұзуы» бойынша сотқа дейінгі іс жүргізуді бастады. Сотқа дейінгі тергеу амалдары жүргізіліп жатыр.

Абзал Алпысбайұлы, Ақмола облысы