Павлодар полицейлері Екібастұзда өтіп жатқан үйлену тойының үстінен түсті

Тойға 60-тан көп адам шақырылған

Мониторинг тобы 6 қарашада сағат 17:45 шамасында Екібастұз қаласы, Абай көшесінде орналасқан «Бәйтерек» мейрамханасының банкет залында 60-тан астам адамның қатысумен өтіп жатқан үйлену тойының үстінен түсті. Тойға келген меймандардың бәрі таратылып, мейрамхана директорына қатысты ҚР әкімшілік құқық бұзушылық туралы кодекс 425-бабының 1-бөлігі бойынша әкімшілік хаттама толтырылды. Бұл туралы облыстық ПД баспасөз қызметі хабарлайды. 

7 қарашада М.Жүсіп көшесінде орналасқан «Пирамида» сауда үйіндегі «Планета одежды» бөлімі карантиндік шектеулерге қарамастан демалыс күні де жұмыс істеген.  

Жиналған материалдар шешім қабылдау үшін Екібастұз қалалық Тауарлар мен көрсетілетін қызметтердің сапасы мен қауіпсіздігін бақылау басқармасына тапсырылды.

Павлодар облысындағы эпидемиологиялық жағдайды тұрақтандыру мақсатында 9 қарашадан бастап шектеу шаралары күшейтілді. Қоғамдық тамақтану объектілерінің жұмысы 20:00-ге дейін шектелген. Сондай-ақ, азық-түлік емес, жабық және ашық базарлардың жұмысы тоқтатылады. Моншалар мен сауналар да жұмыс істемейді.

«Азаматтардың денсаулығы аса маңызды. Карантин режимін сақтамаған адамдар жауапкершілікке тартылады. Өйткені, олар өздеріне ғана емес, айналасындағыларға да қауіп төндіреді», - деді департамент бастығының бірінші орынбасары Жасқайрат Қайыров.

Еске сала кетейік, Қазақстанда коронавирустың таралуына қатысты «қызыл аймақтағы» өңірлердің қатарына Павлодар облысы да қосылды.

×
Бұл желілік ресурстың ақпараттық өнімдері 18 жастан асқан адамдарға арналған.