Ақтөбеде дәрігерлер қабылдамай қойған 5 жасар қыз қайтыс болды

Ақтөбеде үш бірдей аурухана дәрігерлері қабылдамай қойған бес жасар қыз көз жұмды. Қызуы көтеріліп әлсіреген Іңкәр есімді бүлдіршін жедел жәрдеммен жеткізілсе де, дәрігерлер қабылдамай, бір-біріне сілтеп, сенделтіп қойған. Баланың диагнозын тек шетінеген соң ғана анықтапты, деп хабарлайды  Azattyq Rýhy КТК арнасына сілтеме жасап.

«Балалар ауруханасына барғанымызда олар инсульт болуы мүмкін деп тексерді. Қабылдау бөлімінде төрт сағат отырдық. Одан кейін тағы екі ауруханаға бардық. Еш диагноз қоймады. Осылай сандалып жүргенімізде, қызым әлсіреп кетті», – дейді Іңкәрдің анасы Алмагүл Ахметова.

Қазір баласынан айырылған қаралы отбасы дәрігерлердің үстінен прокуратураға шағымданды. Олар үш аурухананы қатар тексеретін болады. Оған арнайы комиссия да құрған. Шетінеген қыздың туыстары қызуы көтерілген бойда жедел жәрдем шақырғанын айтады.

Алдымен облыстық балалар ауруханасына апарып, төрт сағаттан соң менингит болар деген күдікпен жұқпалы аурулар ауруханасына жіберген. Ол кезде қызуы түспей қойған Іңкәрдің бір жақ қолы істемей қалыпты. Ондағылар да «жұқпалы дерті жоқ» деген желеумен қалалық балалар ауруханасына апаруды сұрайды. Ол жақтан тағы кері қайтарады. Ақыры бүлдіршін жансақтау бөліміне түскенде жүріп кетіпті. Денсаулық саласына жауапты шенеуніктер қыздың вирусты дерттің миға шабуынан қайтқанын айтады. 

«Ұйымдастырушылық-тактикалық кемшілік болғанын білеміз. Себебі, бала бірнеше қабылдау бөліміне барған. Комиссия анықтағаннанан кейін барлық шараны қолданамыз», – деді Ақтөбе облыстық денсаулық сақтау басқармасы басшысының орынбасары Светлана Есенаманова.