Қызылорда облысында жайылып жүрген 700-ге жуық қой өртеніп кетті
Одан бөлек, ұсақ малдар күйіп қалған
Қызылорда облысының Жаңақорған ауылында жайылып жүрген 700-ге жуық ұсақ мал өртеніп кетті. Бұл туралы Төтенше жағдайлар министрлігінің баспасөз қызметі хабарлайды.
«2020 жылы 21 қазанда сағат 18.50-де Қызылорда облысы Жаңақорған ауданы Аққорған ауылдық округінің Түгіскен ауылында шамамен 30 гектар болатын шабылған күріш алқабында құрғақ сабан өртенген. Өрт сол күні сағат 21.48-де толық сөндірілді. Өртті сөндіруге ТЖД мен еріктілерден құралған 19 адам мен 5 техника жұмылдырылды», - делінген хабарламада.
Алдын ала болжам бойынша, өрт салдарынан жеке шаруа қожалығына тиесілі жайылып жүрген 700-ге жуық қой өртеніп кеткен. Одан бөлек, күйіп қалған ұсақ мал бар. Олардың нақты саны анықталып жатыр. Оқиға орнында арнайы құрылған комиссия жұмыс істеуде.
