Жыл басынан бері тұрмыстық зорлық жасағаны үшін 19 мың адам әкімшілік жауапқа тартылған

Қазақстанда жыл басынан бері тұрмыстық құқықбұзушылық әрекетін жасаған 19 мың адам әкімшілік жауапқа тартылған. Бұл туралы ІІМ әкімшілік полиция комитетінің төрағасы Мұрат Баймұқашев мәлім етті.

«Жыл басынан бері тұрмыстық сипаттағы құқықбұзушылық жасаған 19 мың адам әкімшілік жауапкершілікке тартылған. 61,7 мың қорғау нұсқамасы енгізіліп, 7,8 мың құқық бұзушыға қатысты ерекше талаптар қойылып, 5,4 мың адамға алкоголь мен есірткі өнімдерін пайдалануға тыйым салынды. Тұрмыстық зорлық әрекетіне баратындардың 82%-ы – жұмыссыздар. Және мұндай қылмыстың 50%-ы ішімдік ішу жағдайында жүзеге асырылады», - деді комитет басшысы.

Комитет төрағасының мәліметіне сүйенсек, тұрмыстық зорлықтан зардап шегушілердің дені – әйелдер (54%), кәмелет жасына толмағандар - 6%, әкелері мен бауырларынан зардап шегетін ерлер - 40%.  

Еске сала кетейік, жыл басынан бері полиция қызметкерлері 8,6 мың адамды дағдарыс орталықтарына тапсырған.

Айжан Қалиева, Нұр-Сұлтан