Көкшетау полицейлері жоғалған 13 жасар қыздың денесін тапты

Көкшетауда жоғалып кеткен 13 жасар қыз өлі күйінде табылды, деп хабарлайды Azattyq Rýhy тілшісі Ақмола облысы полиция департаментінің баспасөз қызметіне сілтеме жасай отырып.

Бұған дейін хабарлағанымыздай, жоғалып кеткен 13 жасар Әйгерім Хайдарованы іздеу жұмыстары Көкшетауда сегізінші тәулікке жалғасты. 21 тамызда анасы полицейлерге бір күн бұрын Нұрлы көш ауылындағы үйден шаштаразға шығып, үйіне оралмағанын, ұялы телефоны өшірілгенін, тұрған жері белгісіз екенін хабарлады. Осы факті бойынша ҚР ҚК 99-бабы (Кісі өлтіру) бойынша сотқа дейінгі іс жүргізу басталды, 200-ден астам куәгерден жауап алынды.

«Іздестіру іс-шаралары барысында Көкшетау полицейлері кәмелетке толмаған Әйгерім Хайдарованың денесін тапты. 28 тамыз 17:45-те Көкшетау полиция басқармасының қызметкерлері Красный яр ауылынан бес шақырым жерде орман алқабын аралап жүріп, кәмелетке толмаған қыздың жер бетіне шашылған денесін тапты», – деді полиция қызметкерлері.

Полицейлер тергеуді жалғастыруда, тергеу мүддесі үшін басқа ақпарат жарияланбайды. Істі облыстық полиция департаментінің басшысы ерекше бақылауға алды.

Жоғалған қызды іздеуге 500-ден астам полиция қызметкері, ТЖД қызметкерлері, әскери және еріктілер жұмылдырылды.