Атырауда тұңғиықгүлді үзген тұрғын жазаланады

Карантинде атыраулықтар тұңғиықгүл алқабын тамашалау үшін Құрманғазы ауданына баруды жиілеткен. Бірақ көпшілік сирек өсетін гүлді үзбек түгілі, ұстауға болмайтынын біле бермейді, деп жазды Ақжайық.

«23-30 тамыз аралығында бүкіл республика бойынша өткізіліп жатқан «Таза Қазақстан» жедел-алдын алу шарасы аясында аудандық полиция бөлімінің қызметкерлері Орман шаруашылығы және жануарлар дүниесі инспекциясымен бірлесіп, экологиялық құқықбұзушылықтарды анықтау және жолын кесу бойынша рейд өткізді. Серезез учаскесінің маңындағы Қиғаш өзенінде олар Приморск ауылдық округінің тұрғыны басқарған «Ямаха» моторлы «Бударка» қайығын тоқтатты. Қайықта алты жолаушы болған. Олардың бірінен Қызыл кітапқа енген және қорғауға алынған тұңғиықгүл табылды»,- делінген ақпаратта.

Жолаушы гүлдеп тұрған тұңғиықгүлді тамашалау үшін Құрманғазы ауданына экскурсияға Атыраудан арнайы келгенін айтты. Ол бұл сұлулықты камерасына түсіре алмаған, телефонының қуаты бітіп қалыпты. Сондықтан отбасына көрсету үшін бірнеше гүлді жұлып алған екен. Енді оны әкімшілік жауапқа тарту туралы шешім қабылданады.