Көкшетауда мәдениет сарайынан өрт шықты

Ақмола облысының орталығындағы «Көкшетау» мәдениет сарайынан өрт шықты, деп хабарлайды Azattyq Rýhy тілшісі Ақмола облысының Төтенше жағдайлар департаментінің баспасөз қызметіне сілтеме жасап.

Өрт шыққаны белгілі болған соң мәдениет сарайында жүрген 25 адам эвакуацияланды, адам шығыны жоқ. 

«Бүгін күндіз сағат 10:55-те «Көкшетау» мәдениет сарайының өртеніп жатқаны жайлы хабарлама жетті. Өрт ғимарат  шатырынан шыққан. Дереу дабыл қағылып, жеке құрамның отыздан астам сарбазы мен алты бірлік өрт сөндіру техникасы, сондай-ақ «Көкшетау су арнасы» коммуналдық кәсіпорнының бір техникасы мен бір қызметкері жұмылдырылды. Мәдениет сарайының 10 шаршы метр аумағы өртке оранған. Өрт сағат 11.33-те толықтай сөндірілді», - дейді Ақмола облысы Төтенше жағдайлар департаменті бастығының міндетін атқарушы Қанат Доспаев.

Қазір ғимараттың өртенген бөлігін бұзып алу жұмыстары жүруде және өрттің шығу себебі анықталып жатыр.

Абзал Алпысбайұлы, Ақмола облысы