Еңбекақысын талап еткен жұмысшылар мұнарадан секірмек болды

Жамбыл облысында еңбекақысын ала алмаған жұмысшылар су мұнарасының ұшар басына шығып алып, «Бас мердігер маңдай тер ақымызды бермесе, биіктен құлаймыз» деп мәлімдеді, деп хабарлайды Azattyq Rýhy КТК арнасына сілтеме жасап.

Барлығы бес адам 2 миллион 180 мың теңгеге тапсырыс алған. Олар тротуар төсеп беруі тиіс еді. Алайда, жұмыстың аяқталуына жақын қалғанда бас мердігер жұмысқа көңілі толмайтынын айтып, бәрін бұзғызып, қайта істеуді тапсырыпты. Ашуланған жұмысшылар кәсіпкерден осыған дейін еткен еңбектің ақысын беруді талап етеді. Мердігер оған көнбеген. Амалы таусылаған бес адамның екеуі биік су мұнарасына шығып, талап қоюға мәжбүр болған.

«Есеп айырыспаса, өлеміз!» деген екеуді ешкім төмен түсіре алмай әуреге түсті. Арадағы жеті сағаттық келіссөзден кейін бас мердігер жұмысшылардың еңбекақысының бір бөлігін беруге келісті. Яғни, сұралған 1 млн 300 мың теңгенің 800 мың теңгесі қолма-қол қайтарылды. Содан кейін шу көтергендер жерге түсті. Ал кәсіпкер жұмысшылардың бұл әрекетін «бопсалау» деп отыр. Оның айтуынша, олар сапасыз құрылыс жүргізген.

«Заңсыз алып тұр, мұны бопсалау десе де болады. Бізге олардың істеген жұмыстарына қатысты акт әлі келген жоқ, енлі келеді. Акт болмағандықтан, біз ақшаны төлей алмаймыз. Жұмысшылар жұмысты істегенімен, дұрыс атқармаған. Сондықтан техқадағалау қабылдамай, бұзғызып тастады», – дейді бас мердігер Жұмағұл Байменов.