Астанада суши жеген ерлі-зайыпты уланып қалғанын мәлімдеді

Астана тұрғыны әлеуметтік желіде отбасылық кешкі астың ауыр салдарға ұласқанын айтып берді. Әйелдің сөзінше, ол күйеуімен бірге елордадағы дәмханалардың бірінде суши жеп, уланып қалған. Сондай-ақ ол санитариялық қызметтердің жедел әрекет етуіне қалай тырысқанын баяндады. Жарияланымға полиция да назар аударды, деп хабарлайды Azattyq Rýhy.

Астана тұрғынының айтуынша, сенбі күні ол отбасымен Абылай хан көшесі, 29 мекенжайындағы «Мико» дәмханасында болған. Ерлі-зайыпты бір сеттен суши жеген, ал үлкен қызы тек пицца жеген. Алты-сегіз сағаттан кейін ерлі-зайыптының екеуінің де бір мезгілде жағдайы нашарлаған: қатты құсу, іш өту, түйілу басталып, дене қызуы көтеріліп, әлсіздік пайда болған.

«Жағдайымыздың нашар болғаны сонша, түнде жедел жәрдем шақыруға тура келді. Екеумізді де ауруханаға жатқызғысы келді, бірақ үйде екі кішкентай баламыз бар, кіші қызымыз небәрі екі айлық. Балаларды қалдыратын адам болмағандықтан, ауруханаға жатудан бас тартуға тура келді», – деп жазды ол Threads желісінде.

Оның айтуынша, үлкен қызының жағдайы қалыпты болған. Тапсырыстағы сушиді тек ерлі-зайыпты жеген.

Жарияланым авторы «Мико» дәмханасына хабарласқан. Оның сөзінше, дәмхана өкілдері көмектесе алмайтындарын айтып, ерлі-зайыптының дәл сол жердегі сушиден уланғанын растайтын анықтама сұраған.

Осыдан кейін әйел e-Otinish арқылы санитариялық-эпидемиологиялық қызметке ресми шағым түсіргенін айтты. Алайда оны электронды өтінішті қарауға уақыт кететіні алаңдатқан. Өйткені улануға шынымен тағам себеп болған жағдайда, қауіп тудыруы мүмкін өнімдер осы уақыт аралығында сатылымда қала беруі ықтимал.

Астана тұрғыны аудандық санитариялық-эпидемиологиялық қызметке, қалалық департамент пен комитетке де хабарласуға тырысқан. Алайда оның айтуынша, көрсетілген нөмірлердің ешқайсысы жауап бермеген.

«Сонда екі адам бір тағамды жегеннен кейін ауырып, жедел жәрдем шақырса да, бұл туралы санитариялық қауіпсіздікке жауапты органға жедел хабарлау мүмкін емес пе?» – деп жазды ол.

Жарияланымға елорданың «Алматы» ауданы полиция басқармасы жауап берді.

«Аталған дерек «Алматы» ауданы полиция басқармасының ақпаратты есепке алу кітабына тіркелді. Жиналған материал құзыреті шегінде қарау және шешім қабылдау үшін Астана қаласы «Алматы» ауданының санитариялық-эпидемиологиялық бақылау департаментіне жолданады», – деп хабарлады полиция.

Енді полиция жинаған материалдарды елорданың «Алматы» ауданындағы санитариялық-эпидемиологиялық бақылау департаментінің мамандары қарайды.