Зейнетақы қорының ақшасына тіс емдету: емхана дәрігерлеріне қатысты да тергеу басталды (ВИДЕО)

Тіс емдеу үшін «Бірыңғай жинақтаушы зейнетақы қорындағы» артық ақшаны заңсыз шешу ісінде емхана дәрігерлеріне қатысты да тергеу басталды, деп хабарлайды Azattyq Rýhy.

Қаржы мониторинг агенттігінің бүгін, 6 қаңтарда таратқан ақпаратына сүйенсек, дәрігерлер жалған анықтама жазып бергені үшін шамамен 30 млн теңге сыйақы алған.

«Қаржы мониторинг агенттігі «Бірыңғай жинақтаушы зейнетақы қоры» АҚ-дан азаматтардың жинақтарын заңсыз шығару деректері бойынша стоматологиялық клиникалардың басшылары мен өзге де адамдарға қатысты тергеп-тексеруді жалғастырып жатыр. Зейнетақы жинақтары стоматологиялық қызметтер көрсету туралы формальды шарттар жасасу және кейіннен жалған медициналық құжаттар ұсыну арқылы шығарылғанын еске саламыз.Аталған көмек үшін күдіктілер алынған қаражаттың 10%-дан 20%-ға дейінгі мөлшерінде заңсыз сыйақы ұстап отырған», - деп хабарлайды ҚМА.

Қылмыстық схемаға қатысқан стоматологиялық клиникалардың саны  42 клиникаға жеткен. Залал – 200 млрд теңге. 11 күдікті 2 айға қамалған, ал үш күдікті үйқамақта

«Бұдан өзге, заңсыз сыйақы алу үшін жүйелі түрде дәрігерлік-консультациялық комиссиялардың (ДКК) жалған қорытындыларын берген әртүрлі медициналық мекемелердің дәрігерлеріне қатысты сотқа дейінгі тергеп-тексеру басталды. Күдіктілерден алынған қаражаттың жалпы сомасы 30 млн теңгені құрады», - деп хабарлайды ҚМА.