Қазақстанда егін жинау науқаны аяқталды: 26,5 млн тонна астық жиналды

Биыл ауыл шаруашылығы дақылдарының жалпы жинау алаңы 23,3 млн гектарды құрады, оның ішінде 16,7 млн гектары дәнді және бұршақты дақылдарға тиесілі. Барлығы 26,5 млн тонна астық бастырылды, деп хабарлайды Azattyq Rýhy.

Орташа өнімділік гектарына 16 центнерді құрап, өткен жылғы көрсеткіштерден жоғары болды. Негізгі астық егетін өңірлер арасында Солтүстік Қазақстан облысында жоғары өнімділік тіркеліп, гектарына 18,6 центнерге жетті. Оңтүстік өңірлерде, атап айтқанда Қызылорда, Түркістан және Жетісу облыстарында да жоғары көрсеткіштер байқалады.

Ауыл шаруашылығы министрі Айдарбек Сапаров Үкімет отырысында күздің қолайлы ауа райы жағдайлары жауын-шашынға қарамастан айтарлықтай шығынсыз егін жинау науқанын жүргізуге мүмкіндік бергенін атап өтті.

«Жоғары өнімділікке қол жеткізуге ауа райының қолайлы болуы мен агротехнологияларды дұрыс қолдану, атап айтқанда сапалы тұқымдарды пайдалану, минералды тыңайтқыштарды енгізу және өсімдіктерді тиімді қорғау ықпал етті», — деді министр.

Дәнді дақылдарды жинау аяқталды, ал жүгері жинау науқаны әлі жалғасуда.