Каспий жағалауында казино салынбайтын болды

Бүгін Мәжілістің жалпы отырысында «Қазақстан Республикасының кейбір заңнамалық актілеріне ойын бизнесі мәселелері бойынша өзгерістер мен толықтырулар енгізу туралы» заң жобасы бірінші оқылымда қаралды. Баяндама жасаған Мәдениет және спорт министрі Ақтоты Райымқұлова заң жобасы аясында көзделіп отырған біраз өзгерістер туралы хабарлады.

Дәлірек айтсақ, осы заң жобасы арқылы бәс тігуге қатысушылардың деректер қоры жалпыға бірдей декларацияланбақ. Сондай-ақ Қазақстанда букмекерлік кеңселер енді тек спорттық оқиғаларға ғана ставка қабылдауға міндеттеледі. Ақтоты Райымқұлова атап өткендей, құжаттың ең негізгі мақсаты –құмар ойынға басымен кіріп, бәс тігуге тәуелді болып қалған азаматтардың санын қысқарту.

Оқи отырыңыз: Құмар ойын киелі Маңғыстауға да баруы мүмкін

Депутаттардың сұрақтарына жауап бере отырып, министр осы мақсатты орындау үшін заң жобасынан жаңа құмар ойын аумақтарын құру туралы өзгеріс жойылғанын хабарлады.

Яғни, Маңғыстау облысында, Каспий жағалауында салынады деген бір құмар ойын аумағы, Алматы облысының Талғар және Панфилов аудандарында бір-бірден салынатын тағы екі казино аумағы салынбайтын болды.

«Ойын бизнесі туралы заң жобасын енді дайындаған кезде жаңа ойын аумақтарын құру туралы концепцуалды норма болған. Оның бірнеше мақсаты бар еді. Мәселен, туристік қызметтер көлемін арттырып, халықаралық деңгейдегі туристік кластер құру көзделген еді. Яғни, жаңа құмар ойын аумақтары инвестор тартып, соның есебінен құмар ойын аумағындағы бүкіл инфрақұрылымды жақсарту көзделген. Және бюджетке де түсім түседі деген едік. Бірақ, норманы жан-жақты қарау кезінде азаматтарымыздың әлеуметтік жауапкершілігі мен денсаулығы маңызды екені назарға алынып, жаңа үш құмар ойын аумағының құрылысынан бас тарттық», - деп түсіндірді Ақтоты Райымқұлова. 

Қазір Қазақстанда екі құмар ойын аумағы бар, оның бірі – Қапшағай қаласында болса, екіншісі Щучье қаласында орналасқан. Ақтоты Райымқұлованың айтуынша, жаңа казинолар салу еліміздегі жастарға кері әсерін тигізуі мүмкін.

«Халықтың экономикалық белсенді бөлігі құмар ойын мен ойын бизнесіне бас сұғады. Бұл жастарға көп зиянын тигізуі мүмкін. Жарнама есебінен құмар ойынға келетін жастар қатары көбейіп кетуі мүмкін. Жастар жетістікке деген мотивациясынан айрылады, шаңырақтары шайқалады. Сондықтан, туристік саланы дамытудың басқа да тетіктері бар екенін ескеріп, осы нормадан бас тарттық», - деп қайталады министр.

Кенжекей Тоқтамұрат, Нұр-Сұлтан