«АрселорМиттал Теміртау» компаниясын Қазақстанның пайдасына беру рәсімдері аяқталуға жақын - Смайылов

Үкімет отырысында Премьер-министр Әлихан Смайылов «АрселорМиттал Теміртау» компаниясын Қазақстанға беру рәсімі жайлы айтты, деп хабарлайды Azattyq Ruhy.

«Мемлекет басшысы Костенко шахтасында кеншілердің қаза болуына байланысты тергеу жұмыстарын жүргізіп, «АрселорМиттал Теміртау» компаниясымен инвестициялық ынтымақтастықты тоқтатуды тапсырды. Осындай апат биыл тамыз айында да болған. Ол кезде  5 шахтер қаза тапты. Көптеген адам өліміне әкеп соққан апат өндірістегі қауіпсіздік талаптарының сақталмауымен тікелей байланысты», - деді Смайылов.

Ол атағандай, бұл – бірінші кезекте, кәсіпорын басшылығының кінәсі.

«Олар компания жұмысынан  өздерін шеттетіп тастаған. Мұндай әрекетсіздіктің салдары бірнеше жылдар бойы қайғылы жағдайларға әкеп соғуда. Компания өз міндеттемелерін орындаған жоқ. Қазіргі таңда «АрселорМиттал Теміртау» компаниясын Қазақстанның пайдасына беру рәсімдері аяқталу сатысында. Комиссия апаттың себептерін жан-жақты тексеріп, оған кінәлі адамдарды анықтау жұмыстарын жалғастырады. Қарағанды облысының әкімдігі мен Төтенше жағдайлар министрлігі апатты жою жөнінде шаралар қабылдауы тиіс. Ең бастысы – қаза тапқандардың отбасыларына барлық көмекті көрсетіп, зардап шеккендердің денсаулықтарын қалпына келтіру.

Осындай қиын жағдайда ешкім де назардан тыс қалмайды», - деді Премьер-министр.

Авторы: Аягөз ҚҰРМАШ