Абайдың 175 жылдығын атап өтуге бір министрліктің өзінен 3 млрд теңге бөлінеді

Мәдениет және спорт министрлігінің Абай Құнанбайұлының 175 жылдығына арнап өткізетін шараларының саны жетпіске жуықтайды. Бұл туралы бүгін Орталық коммуникациялар қызметінде Мәдениет және спорт вице-министрі Нұрғиса Дәуешов мәлім етті.

Министрліктің мәліметіне сүйенсек, Абай Құнанбайұлының 175 жылдың мерейтойын дайындау және өткізу жөніндегі жалпы республикалық жоспарға сәйкес, халықаралық және республикалық қоғамдық маңызы бар, ғылыми, ағартушылық іс-шаралар, конференциялар, симпозиумдар, пленэрлер, дөңгелек үстелдер, сынып сағаттары, поэтикалық және әдеби конкурстар, баспасөз турлары және өзге де іс-шаралар өтеді деп жоспарланып отыр.

Маңызды жобалардың бірі ретінде Абай шығармаларының жинағы 10 тілге аударылатынын хабарланды. Сондай-ақ, ақын жайлы үш деректі-қойылымдық фильм түсіріледі.

«2020 жылғы тамызда Семей қаласында «Абай мұрасы және әлемдік руханият» атты халықаралық ғылыми-практикалық конференция өтеді. Ал, ұлы Абай мерейтойының ресми салтанатты ашылу рәсімі 2020 жылғы 21 қаңтарда Нұр-Сұлтан қаласында өтеді», - деді вице-министр.

Баспасөз мәслихатына жиналған журналистерт ақынның 175 жылдығын тойлау үшін бюджеттен қанша қаражат қарастырылып отырғанын сұрады.

«Мемлекеттік тойлауға байланысты Мәдениет және спорт министрлігінде қатысты жыл сайын гастрольдік сапарларға, басқа да ғылыми-тәжірибелік конференцияларға бөлінетін қаражат бар.  Биыл бөлінген қаражаттың барлығын Абай жылына арнап отырмыз. Шаралардың барлығы жыл сайын министрлікке бөлінетін қаражат есебінен деп (атап өтеміз – авт.) жоспарлап отырмыз», - деді ол алғашқы бірнеше сұраққа жауап бере отырып.

Вице-министр журналистің нақтылап қойған төртінші сұрағына жауап бере отырып, Абайдың 175 жылдық мерейтойын атап өтуге тек министрліктің өзінен 3 млрд теңге бөлінетінін жеткізді. Ал, әкімдіктер мен басқа ведомстволардың ұлы ақынның мерейтойына қанша қаржы жұмсайтынын айтқан жоқ.

«Мәдениет және спорт министрілігіне байланысты ғана Абайдың 175 жылдығына арналған шараларға жоспарланған қаржы 3 млрд теңгеге жуық», - деді Нұрғиса Дәуешов.

Кенжекей Тоқтамұратқызы, Нұр-Сұлтан