ШұғылCOVID-19: Қазақстанда өткен тәулікте 7800-ге жуық адамнан вирус анықталды

Балқаш көлі де Аралдың күйін кешпей ме?

Вице-министр Балқаш көліне төнуі мүмкін экологолиялық қауіп туралы айтты

фото: shutterstock

Экология, геология және табиғи ресурстар вице-министрі Серік Қожаниязов Балқаш көліне төнуі мүмкін ықтимал экологиялық апатқа қатысты БАҚ-та жарияланған ақпаратқа түсініктеме берді.

Вице-министрдің айтуынша, бұл ақпарат шындыққа жанаспайды.

«Соңғы он жылда көл деңгейі Балтық жүйесі бойынша 341 М белгісінен төмен түспегенін атап өткен жөн. Ғалымдар көп жылғы бақылау мен зерттеулерге сүйеніп, Балқаш көлінің толыққанды су объектісі ретінде өмір сүруінің оңтайлы деңгейі БЖ бойынша белгісі 341 М деп пайымдайды», - деді вице-министр.

Оның айтуынша, жыл сайын Балқашқа 12 текше метр су құйылса, көлдің тұрақты деңгейде сақталуына кепілдік беріледі. Сонымен бірге, Добын шекара бекетіндегі гидрологиялық деректерді талдау Іле өзенінің орташа ұзақ мерзімді ағыны 2001 жылдан 2020 жылға дейін 13,8 текше метрді құрайтынын көрсетті.

«Осылайша, бүгінгі таңда Арал тағдырының қайталануы Балқаш көліне қауіп төніп тұрған жоқ», - деп атап өтті вице-министр.

Ведомство өкілі Қытаймен су бөлу жөніндегі келіссөздер процесінде қазақстандық тараптың ұстанымы Іле өзенінің ағынын кемінде 12 текше метр көлемінде ұстап тұру екенін мәлімдеді.

«Еліміздің ұстанымы - су бөлу кезінде экожүйемүдделерін ескеру. Осыған байланысты, Қазақстан тарапы Балқаш көлін Іле өзенінің негізгі су тұтынушыларының бірі ретінде көрсетеді. Біз Балқаш көлі өзен ағысының көлеміне байланысты екенін айтудан жалықпаймыз», - деді Серік Қожаниязов.

Сонымен қатар, вице-министр Қытай тарапы да өзінің шекарасына жақын аумақта экологиялық апаттың болғанын қаламайды деген болжам айтты.

«Бұған 2019 жылдың қазан айында Бейжіңде өткен бірлескен комиссияның 17-ші отырысында Қытай тарапы трансшекаралық өзендерді су бөлу туралы келісім жобасын талқылау кезінде Тараптардың экожүйелерін дамыту мен сақтау мүдделерін ескеруге келіскендігі дәлел. Бұл Балқаш көлінің экологиялық жағдайы үшін өте маңызды», - деп хабарлады Серік Қожаниязов.