Қазақстан мен АҚШ млрд доллар сомаға дейінгі келісімге қол қойды

Үкімет басшысы Асқар Мамин АҚШ халықаралық даму қаржы корпорациясының (DFC) бас атқарушы директоры Адам Болермен келіссөз жүргізді.

Тараптар АӨК, туризм, логистика, инфрақұрылым, сондай-ақ қаржы және технологиялар салаларындағы инвестициялық ынтымақтастықты дамыту перспективаларын талқылады. Бұл ретте Қазақстан экономикасының жеке секторын дамытуға бағытталған жобалар мен бастамаларды бірінші кезекте іске асыру қажет екені атап өтілді.

Келіссөз қорытындысы бойынша «Астана» халықаралық қаржы орталығының әкімшілігі» АҚ мен АҚШ халықаралық даму қаржы корпорациясы арасында инвестициялық ынтымақтастық туралы келісімге қол қойылды. Құжат Қазақстанда $1 млрд дейінгі сомаға АХҚО платформасы арқылы бірлескен инвестициялық жобаларды іске асыруды көздейді.

DFC АҚШ-тың даму институты, ол шетелде жеке жобаларды қаржыландыруды қамтамасыз етуге және қолдауға жауапты. DFC 2019 жылғы 20 желтоқсанда Шетелдік жеке инвестициялар корпорациясының (OPIC) АҚШ-тың халықаралық даму агенттігінің (USAID) дамуды несиелендіру басқармасымен бірігуі арқылы құрылды.

Келіссөзге Қазақстан тарапынан бірінші вице-премьер Әлихан Смайылов, ҚР Стратегиялық жоспарлау және реформалар жөніндегі агенттігінің төрағасы – АХҚО басқарушысы Қайрат Келімбетов, сыртқы істер министрі Мұхтар Тілеуберді, Америка тарапынан — АҚШ-тың Қазақстандағы елшісі Уильям Мозер, DFC бас атқарушы директорының кеңесшісі Калеб Маккарри, DFC басқарушы директоры Аллисон Майнор қатысты.