Ералы Тоғжанов: Әрбір ауылға дәрі жеткізу – «СҚ-Фармацияның» міндеті

Премьер-министрдің орынбасары Ералы Тоғжанов «СҚ-Фармацияның» жуырда тағайындалған жаңа басшысымен бірге дәрі-дәрмек сақталатын қоймаларды аралап көрді. Бұл туралы «Қазақстан» ұлттық арнасының ақпарат қызметі хабарлады.

Дереккөз мәліметіне сүйенсек, таяуда еліміздің барлық өңіріндегі емдеу мекемелері  дәрі-дәрмекпен толық қамтылады. Қазір өңірлерде бір айға жететін препараттар қоры бар. Ол дәрілер бүгіннен бастап ауыл-аймаққа таратылады. Тағы үш айға қосымша қор жинауға қаржы бөлініп қойған. Премьер-министрдің орынбасары Ералы Тоғжанов препараттар сақталатын қоймаға барып, жағдайды өз көзімен көрген. 

Сондай-ақ, Ералы Тоғжанов «СҚ-Фармацияның» жаңа басшысына шеттен дәрі кіргізуде кедергі болмау керек деген тапсырма берген. 

«Әрбір ауылға дейін жету керек. «СҚ-Фармациядан» шығатын бүкіл дәрі ауруханаларға жетуі керек. Ауруханалардың ішінде қоғамдық бақылау болуы керек. Ауруханаға жеткен дәрінің бәрі науқастарға жетуі тиіс. Соны сіз қадалағалуыңыз қажет», - деді Тоғжанов.

Вице-премьер коронавирус пен пневмонияны емдеуге пайдаланылатын және тізімдегі негізгі 21 дәрімен қамтамасыз етуде мәселе туындамау қажет деді. Дәріханаларға препарат жеткізетін жеті компанияға мемлекет жан-жақты қолдау көрсетеді. Дәрі-дәрмек жеткізу үшін ұшақтар беріліп, олардың елге кіруі үшін бұрынғыдай апталап құжат жиналмайтын болды.