Қазақстанда жанармайға сұраныс 40% төмендеп кеткен

Қазақстанның ірі қалаларында жарияланған карантиннен кейін бензин мен дизель отынына деген сұраныс күрт төмендеп кеткен. Бұл туралы «ҚазМұнайГаз» ҰҚ АҚ баспасөз қызметі хабарлады.

Халықтың жанармайды тұтынуы 40%-ға, авиакеросинді тұтыну 70%-ға төмендеп кеткендіктен, мұнай өңдеу зауыттары ең төменгі қуатпен жұмыс істеп жатыр.

«Қоймаларда мұнай өнімдерінің шамадан тыс жиналып қалуын болдырмау үшін Атырау, Павлодар және Шымкент МӨЗ-дерінде мұнай өңдеу мен мұнай өнімдерін шығару көлемдері ең төмен деңгейге дейін азайтылды. Зауыттар өз қызметін жалғастыруда», - делінген аталған хабарламада.

Ұлттық компанияның қызметкерлері арасында қауіпсіздік шаралары күшейтілген. Әкімшілік қызметкерлердің 70%-ы қашықтан жұмыс істеуге көшкен. Зауыт қызметкерлеріне құрылымдық бөлімшелер арасында жүріп-тұруға шектеу қойылған.