Елімізде күріш бағасының қымбаттау себептері қандай – БҚДА талдауы

ҚР Бәсекелестікті қорғау және дамыту агенттігі күрішті көтерме сату нарығына талдау жүргізе келе, күріш өндірісі көлемінің әлі де төмендеп, керісінше, бағасының көтеріліп жатқанын анықтады, деп хабарлайды Azattyq Ruhy.

Талдау көрсеткендей, нарық жоғары шоғырланған, онда негізгі өндірушілер (20-дан астам) Қызылорда облысында орналасқан.

Күріштің меншікті өндірісі төмендеп, импорт үлесінің жылдар бойынша динамикада 4-тен 12%-ға дейін ұлғайғаны байқалады. Судың жетіспеушілігіне және шығындардың өсуіне байланысты егіс алқаптарының да азайғаны белгілі болды.

«Бұл ішкі баға өсімінің жоғары динамикасының басты себебі болды. Егер 2022 жылы күріш бағасының өсуі 36%-ды құраса, 2023 жылы – 39%-ды құрады, бұл өткен жылы 3,4%-ды құраған әлеуметтік маңызы бар азық-түлік тауарлары бағасының өсуінің жалпы деңгейінен айтарлықтай асып түседі», - делінген БҚДА хабарламасында.

Айта кетерлігі, баға бойынша сөз байласу негізінде 6 күріш өндіруші 68,7 млн ​​теңге айыппұл түріндегі әкімшілік жауапкершілікке тартылды.

Дегенмен, өндіріс көлемінің төмендеуі мен күріш бағасының көтерілуінің түпкі себептері сақталуда. Бұл суармалы судың жетіспеушілігі, ауыл шаруашылығы техникасы, тыңайтқыштар мен сырттан әкелінетін қаптама бағасының көтерілуі, субсидиялардың уақытылы берілмеуі.

«Осыған орай, монополияға қарсы орган Ауыл шаруашылығы министрлігіне субсидиялар бөлу кезінде күрішті басым дақылдар тізіміне енгізу, оңтүстік өңірлерді сумен қамтамасыз етуді жоспарлауды ұйымдастыру, күріш өндірушілеріне жеңілдетілген несиелендіру үлесін арттыру, күрішті бөлшек сауда желілерімен тікелей сатып алу және тыңайтқыштар мен қаптама материалдарының отандық өндірісін дамыту жөнінде ұсыныстар енгізді», - делінген ведомство хабарламасында.