Өткен жылы мемлекеттік бюджеттің кірісінен шығысы көп болды

Өткен жылы мемлекеттік бюджеттің кірісінен шығысы көп болды. Кірістер 20%-ға өссе, шығындар 24%-ға жетті. Бұл туралы Azattyq Ruhy Finprom.kz сайтына сілтеме жасап хабарлайды.

Мемлекеттік бюджеттің шығыны кірістерден 4%-ға асты.

Finprom-ның деректеріне қарағанда, 2023 жылдың қаңтар–қараша айларында мемлекеттік бюджеттің кірісі 22,2 трлн теңгені құраған, бұл 2022 жылмен салыстырғанда 20,4% - ға артық.

Сонымен бірге, мемлекеттік бюджет шығындары 23,1 трлн теңгеге жетіп, өткен жылдың сәйкес кезеңімен салыстырғанда 24,4% - ға өсті.

Шығындар мен кірістер арасындағы айырмашылық 899,2 млрд теңгені құрады.

2023 жылғы қаңтар–қараша қорытындысы бойынша мемлекеттік бюджеттен білім саласына (22%) 5,1 трлн теңге бөлінген. Жылдық өсім — 27,4%.

Әлеуметтік көмек пен әлеуметтік қамсыздандыруға – 4,8 млрд тг, (17,4%), денсаулық сақтау саласына   – 2,1 млрд тг, (10,4%), тұрғын үй-коммуналдық шаруашылыққа - 1,5 млрд тг (44,9%), көлік пен коммуникация саласына - 1,4 млрд тг (29,3%) жұмсалған.

Өз кезегінде кірістердің басым бөлігін салықтық түсімдер құрайды — 16,6 трлн теңге, (74,8%), бұл өткен жылмен салыстырғанда 22,9% - ға артық. Олардың ішінде қосылған құн салығы – 5,3 трлн теңгені, корпоративтік табыс салығы — 3,9 трлн теңгені, жеке табыс салығы — 1,8 трлн теңгені, әлеуметтік салық — 1,2 трлн теңгені, акциздер — 764,4 млрд теңгені құрады.

Салықтық емес түсімдер 2,6 есеге, яғни 1,5 трлн теңгеге дейін өсті. Негізгі капиталды сатудан түсетін түсімдер, керісінше, 28,1% - ға, 147,3 млрд теңгеге дейін қысқарды. Трансферттер түсімдері 3,9 трлн теңгені құрады, бұл өткен жылмен салыстырғанда 5% - ға кем.