17 өңірде инфляция көрсеткіші баяулады – Ұлттық банк

Қазақстан Ұлттық Банкі ел аймағындағы инфляциялық үрдістер туралы деректі жариялады, деп хабарлайды Azattyq Ruhy.

2023 жылғы қарашада елде жылдық инфляция 10,3%-ды құрап (қазанда – 10,8%), баяулады. Өңірлер бойынша жылдық инфляция 17 өңірде бәсеңдеп, 2 өңірде жеделдеді, тек Абай облысындағы көрсеткіш өзгеріссіз қалды.   

Бұл ретте, қараша айында елдегі айлық инфляция 1% болды.

Жылдық инфляцияның ең жоғарғы мәні Қарағанды, Ақмола және Ұлытау облыстарында тіркелді. Қарашада азық-түлік тауарларының бағасы 9,2%-ға дейін баяулады. Осы топ тауарларының бағасы Ұлытау облысында (12,4%) тез, ал Шымкент қаласында (6,8%) баяу өсті.

Азық-түлікке жатпайтын тауарлар бағасының өсу қарқыны 9,9%-ға дейін баяулады. Ең жоғары мән Маңғыстау облысында (12,2%), ал ең төмен мән Алматы облысында (7,7%) тіркелді.

Қарашада ақылы көрсетілетін қызмет бағасы 12%-ға дейін өсті. Бұл ретте жалпы республикалық деңгейден баға Түркістан облысында (18,1%) біршама жоғары, Астана қаласында (8,4%) айтарлықтай төмендеген.

Авторы: Еркежан АЙТҚАЗЫ