Қазақстанда өнеркәсіпті дамыту қоры құрылды
Қор қазақстандық кәсіпорындарды 3%-дан аспайтын мөлшерлеме бойынша қаржыландыруды қамтамасыз етеді
Қазақстанда Мемлекет басшысының тапсырмасы бойынша өнеркәсіпті дамыту қоры құрылды, деп хабарлады Индустрия және инфрақұрылымдық даму министрлігінің баспасөз қызметі.
Қор индустриялық даму мемлекеттік бағдарламасының қаржы операторы мен «Нұрлы жол» – «ҚДБ-Лизинг» АҚ базасында құрылды.
«Қорды құру өңдеу өнеркәсібінің отандық кәсіпорындарын мемлекеттік қолдау шараларын кеңейтуге мүмкіндік береді. Ол қазақстандық кәсіпорындарды 3%-дан аспайтын мөлшерлеме бойынша қаржыландыруды қамтамасыз етуге бағытталады», - делінген хабарламада.
Қор қызметінің негізгі басымдығы – Президенттің Қазақстан халқына жолдауында айтылған стратегиялық инвестициялық жобаларды жүзеге асыру.
Индустрия және инфрақұрылымды дамыту министрлігі «ҚДБ-Лизинг» АҚ-мен бірлесіп, өңдеу өнеркәсібінің отандық кәсіпорындарын жаңғырту және отандық өндіріс тауарларына деген сұранысты ынталандыру бағытындағы бағдарламаларды іске асырады.
