Елімізде киноиндустрия саласы бұрын-соңды болмаған дағдарысқа ұшырады

Елімізде жалғасып жатқан карантин кино және кино өндірісі салаларын күрт құлдыратты, деп жазады Finprom.kz. Cонымен қатар, тележобалардың түсірілімі де екі есеге дейін азайған.

Биыл алғашқы жартыжылдықта кино, телебағдарлама, музыка және фонограмма жазбаларының өндірісі 17,7 млрд теңгені құраған. Бұл өткен жылдың осы кезеңімен салыстырғанда 31,2 пайызға төмен, яғни 4 млрд теңгеге аз.

Тележобалар мен кинокартиналардың ең көбі биыл Алматыда өндірілді (69,5%), жалпы сомасы – 12,3 млрд теңге. Бұл өткен жылмен салыстырғанда 30,6 пайызға төмен.

Екінші орында – Нұр-Сұлтан қаласы, елордада 3,3 млрд теңгенің жұмысы атқарылды. Бұл да өткен жылмен салыстырғанда 36,6 пайызға аз.

Саланың ішкі қызметтерінің арасында кино, видеофильм және телебағдарламаларды тарату бағыты биыл 11,8 пайызға өсіп, 6,4 млрд теңгені құрады. Кинофильмдерді көрсету қызметі 2,3 есеге кеміп, бар болғаны 4,8 млрд теңге табыс тапты.

Еске сала кетейік, еліміздің Бас санитар дәрігері 16 қыркүйектен бастап ашық аспан астындағы кинотеатрлардың жұмысына рұқсат берді.