Тұран романтизмі. Ұлы даланы бейнелеу өнеріне арқау еткен суретшілер марапатталады

Шараны «Ер Жәнібек» халықаралық қоғамдық қоры мен «TURAN-QAZAQ суретшілер консолидациясы» бірлесіп ұйымдастырған.  Аталған өнер көрмесі «Рухани жаңғыру» бағдарламасы аясында отаншылдық, ұлттық рухты дәріптеу, сондай-ақ, өткен ғасырдағы Қазақ ұлт азаттық күресін басқарған  Оспан батырды, оның күрес жолы мен ерлік рухын ұлықтау мақсатында өтіп отыр.

«Романтизм идеясы бізде Мағжан Жұмабаевтан басталады.  Романтизм болмаса басқа өнерлердің дамуықиын. Мәдениет тарихын қарасаң бәрі бейнелеу өнерінен басталады. Кейін барып әдебиет, музыка дамыған. Сондықтан біз Тұран өркениетінің мұрагері ретінде осындай бастаманы қолға алдық. Ел рухын көтеретін мынау Оспан Батырдың 120 жылдық мерейтойы тура келді де, оның ерлік жолын тақырып етіп алдық. Жалпы ұлттық рухты көтеру керек. Осы романтизм көрмесі арқылы біраз адамдар іріктеліп, өз өнерін көрсетеді деген үміттемін»,- дейді мәдениет қайраткері Жанарбек Берістенов.  

Көрмеге қатысқан көркемөнершілердің туындыларын қабылдау 4 қазаннан 25 қазанға дейін жалғасады. Қатысушы үміткерлердің шығармаларын арнайы қазылар алқасы  сараптап, жүлдегелер анықталады. Осы аралықта баспасөз және өнертанушылар ортасында да талқылаулар өткізіліп, олардың пікірлері де ескеріледі. Көрме қорытындысы 25 қазанда шығарылып, жүлдегерлер марапатталады. Оспан батыр атындағы бас жүлде 1000 000 теңге (1 адам). Бірінші орын (1 адам) 750 000 теңге. Екінші орын (2 адам) 500 000 теңге. Үшінші орын (2 адам) 250 000 теңге сыйақы алады.   

«Бұл шараның ерекшелігі өткен ғасырдың 30-40 жылдардағы қазақ тарихындағы әділеттік, еркіндік жолында күрескен Оспан батырдың бейнесі, сол заманнның өмірін қазіргі қазақстандық суретшілердің кескіндеуімен көрініс таппақ. Бұл жерде тек Оспан батыр емес, Алашордаға қатысты, көшпенділер өмірі, қазақ даласындағы көптеген тұлғалардың бейнесі мен жүрген жолы қамтылады. Сондықтан да «Тұран романтизмі» деп алып отырмыз. Комиссия да  тарих, өнер, көркемөнер сияқты түрлі саланың адамдарынан құралған. Енді өз  деңгейінде сараланып, ең мықты деген өнер иелері марапатталады деген сенімдемін»,-  дейді «Ер Жәнібек» халықаралық қорының төрағасы Жеңіс Түркия.

Биыл  Оспан батырдың 120 жылдығына орай бірнеше атаулы шаралар ұйымдастырылды.  Көктемде қазақ күресінен республикалық турнир,  «Сұлубайдың әні» атты театрландырылған қойылым мен халықаралық жыр мүшайрасы және бұқаралық ақпарат құралдарына арналған бәйге жарияланған.  Түркияда және Моңғолияда батырға арналған халықаралық конференциялар өтті. Жақында Оспан батыр туралы монографияның таныстырылымы мен Нұр-Сұлтан қаласында ақындар айтысы ұйымдастырылмақ. Барлық іс-шаралардың қортындысы ретінде желтоқсан айында Алматыда кеш өткізіледі.

Ришат Асқарбекұлы, Алматы