Қазақ мемлекеттік симфониялық оркестріне 27 музыкант керек

Мәдениет және спорт министрлігі «Қазақконцерт» РМҚК-ге қарасты қазақ мемлекеттік симфониялық оркестр құрамының кеңеюіне байланысты музыканттар іздеп жатыр. Бұл туралы «Қазақконцерттің» ресми сайтында хабарланды.

Ұйымға скрипка (I-II) (10), альт (4), виолончель (4), контрабас (1), арфа (1), гобой (1), флейта (1), кларнет (1), фагот (1), валторна (1), труба (1), тромбон (1) аспаптарында ойнайтын өнерпаздар керек.

Бақ сынаймын деушілер болса, 2020 жылдың 27 тамызына дейін тиісті құжаттарды жолдауы керек. 

Айта кетейік, Қазақ мемлекеттік симфониялық оркестрі –  еліміздегі үздік музыкалық ұжымдардың бірі. Симфониялық оркестр 1991 жылы әлемге әйгілі скрипкашы, ҚР Халық әртісі, Қазақстанның Еңбек Ері Айман Мұсақожаеваның бастамасымен құрылған. Оркестр отандық және шетелдік үлкен сахналарда өнер көрсетеді.