Қытай Израильді Газадағы әскери әрекеттерді дереу тоқтатуға шақырды

БҰҰ Қауіпсіздік кеңесінің отырысында Қытайдың БҰҰ жанындағы тұрақты өкілінің орынбасары Гэн Шуан Израильді Газадағы әскери операцияларды дереу тоқтатуға шақырды, деп хабарлайды Azattyq Rýhy.

Оның айтуынша, қақтығыс шамамен 700 күннен бері жалғасып, екі миллионнан астам тұрғынды жасанды гуманитарлық апат жағдайына душар етті. Бір миллионнан аса адам азық-түлікке мұқтаж.

Қытай өкілі бейбіт халыққа қарсы жасалған шабуылдарға ерекше тоқталды. Оның айтуынша, Израильдің жалғасып жатқан әскери операциялары күн сайын бейкүнә адамдардың өмірін қияды.

«Күш қолдану ешқашан бейбітшілікке әкелмейді. Халықаралық қауымдастық күш біріктіріп, қантөгістің одан әрі өршуіне жол бермеуі тиіс», – деді Гэн Шуан.

Израильдің шабуылдары және халықаралық құқық

Дипломат атап өткендей, Израильдің әскери әрекеттері халықаралық гуманитарлық құқықты өрескел бұзып отыр. Ол дүйсенбі күні Газадағы «Насер» ауруханасына жасалған әуе шабуылы салдарынан 20-дан астам бейбіт тұрғынның, оның ішінде журналистер мен медицина қызметкерлерінің қаза тапқанын мысалға келтірді.

 «Бұл қадамдар қантөгісті күшейтіп, тұрғындардың жаппай қоныс аударуына алып келеді. Қытай бейбіт тұрғындарға зиян келтіретін, азаматтық инфрақұрылымды қирататын және халықаралық құқықты бұзатын кез келген әрекетті айыптайды», – деді ол.