«Зенит» – «Қайрат» ойыны: танымал футболшы 12 жылға сотталуы мүмкін
Украина прокуратурасы матч ресейлік әскерилерді қолдауға қаражат жинау мақсатында өтті деп санайды
Алматылық «Қайрат» клубының бұрынғы футболшысы және Украина құрамасының экс-капитаны Анатолий Тимощукке өз елінде қылмыстық іс қозғалды. Киев прокуратурасының сайтында спортшының Ресей Федерациясына көмектесті деген күдікке ілінгені айтылған, деп хабарлайды Azattyq Rýhy Sports.kz сайтына сілтеме жасап.
Украина Қауіпсіздік қызметінің хабарлауынша, Тимощук 2024 жылдың 8 қыркүйегінде өткен «Зенит» пен «Қайрат» арасындағы жолдастық кездесуге қатысқан. Украина тарапы бұл кездесу ресейлік әскерилерді қолдау үшін қаржы жинау мақсатында өтті деп есептейді.
Ойыншылар алаңға Ленинград қоршауында құрбан болғандарды еске алуға арналған лента тәрізді стильденген жейделерді киіп шыққан. Ойын аяқталғаннан кейін бұл жейделер, оның ішінде Тимощуктің жейдесі аукцион арқылы сатылып, одан түскен қаржы Ресей Федерациясының Курск облысына жіберілді деген ақпарат бар. Тимощуктің жейдесі 700 мың рубльге сатылған көрінеді.
Қандай салдары болуы мүмкін
Украина заңына сәйкес 111-2-бап бойынша күдікті 10 жылдан 12 жылға дейін бас бостандығынан айырылуы мүмкін. Қазір бұл іс бойынша сотқа дейінгі тергеу амалдары жүргізіліп жатыр.
Тимощук – Украинаның ең танымал футболшыларының бірі
Анатолий Тимощук – Украина ұлттық құрамасының бұрынғы жартылай қорғаушысы, «Шахтер», «Бавария», «Зенит» және алматылық «Қайрат» клубының ойыншысы, 2015 жылы карьерасын аяқтады. Ол бұған дейін Ресейдің әрекетін айыптамағаны үшін көпшілік алдында сынға ұшыраған, ал енді қылмыстық жауапкершілікке тартылып жатыр.
Бұған дейін хабарлағанымыздай, 25 сәуірде «Астана Арена» стадионында әлем және қазақ футболының аңыздары құрама командалары арасында жолдастық кездесу өтті.
Оқи отырыңыз:
