Конгода Эбола жұқтырғандар саны 2 мыңнан асты
Індеттен көз жұмғандар саны 754-ке жетіп, жүзден астам медицина қызметкері вирус жұқтырған
Конго Демократиялық Республикасында Эбола қызбасының таралуына байланысты жағдай ушығып барады. Аурудың расталған жағдайлары екі мыңнан асып, қайтыс болғандар саны 754 адамға жетті, деп хабарлайды Azattyq Rýhy.
Елдің денсаулық сақтау органдарының соңғы мәліметіне сәйкес, Конго Демократиялық Республикасында Эбола вирусын жұқтырудың 2011 расталған жағдайы тіркелген. Оның ішінде 366 науқас сауығып шыққан, тағы 753 адам бақылауда және оқшаулауда жатыр.
Індет елдің бес провинциясына — Итури, Солтүстік Киву, Оңтүстік Киву, Жоғарғы Уэле және Чопоға таралған. Ең күрделі эпидемиологиялық жағдай инфекцияның негізгі ошағы болып отырған Итури провинциясында сақталып отыр.
Билік өкілдерінің айтуынша, вирус әлі де белсенді таралып жатыр. Соңғы эпидемиологиялық есепте инфекцияның «тұрақты түрде таралып жатқаны» айтылған. Бұл жаңа жағдайлар санының өсуі жалғасып отырғанын көрсетеді.
Бундибугио штаммынан туындаған қазіргі індет 15 мамырда ресми түрде жарияланған.
Бұған дейін Дүниежүзілік денсаулық сақтау ұйымы Конго Демократиялық Республикасында Эболаның таралуына байланысты дағдарысты жағдай қалыптасқанын ескерткен. ДДСҰ жұқтыру жағдайларының көбейгенін, қаржы тапшылығын және шұғыл шаралар қабылдау қажет екенін атап өтті.
Көп оқылған
