Футболдан әлем чемпионатының алғашқы билеттеріне арналған ұтыс ойыны өтеді
Футболдан алдағы әлем чемпионатының билеттеріне алдына ала тіркелу науқаны басталды
2025 жылдың 27 қазанынан бастап әлемнің түкпір-түкпіріндегі футбол жанкүйерлері FIFA-ның ресми сайтында тіркеліп, 2026 жылғы әлем чемпионатының алғашқы билеттерін ұтып алу мүмкіндігіне ие болады, деп хабарлайды Azattyq Rýhy 1bol.kz сайтына сілтеме жасап.
«Тіркелу процесін 31 қазанға дейін аяқтау қажет. Ал алғашқы билеттерді сатып алу құқығына арналған бұл ұтыс ойынына қатысу – тегін», - деп жазды портал.
Айта кетері, билеттерге ерте тіркелу жүйесі - сатылым басталғанға дейін билеттерді кімнің бірінші сатып алатынын анықтайтын арнайы тәсіл. Бұл жүйе сұранысы жоғары матчтарда (мысалы, ашылу ойыны, финал немесе алаң қожайындарының кездесулері) әділдік пен ашықтықты қамтамасыз ету үшін енгізілген.
Осылайша, әлемнің түкпір-түкпіріндегі жанкүйерлер АҚШ, Мексика және Канада аумағында өтетін футболдан әлем чемпионатына қатысып, тартысты кездесулерді өз көзімен көру мүмкіндігіне ие бола алады.
