Көлігіне бейәдеп сөз жазған Астана тұрғыны 10 тәулікке қамауға алынды

Астана қаласының Мамандандырылған ауданаралық әкімшілік құқық бұзушылықтар жөніндегі сотында автокөлігіне балағат сөз жазған жүргізушіге қатысты іс қаралды, деп хабарлайды Azattyq Rýhy.

Астанада балағат сөздер жазылған көлік жүргізушісі 10 тәулікке әкімшілік қамаққа алынды. Ол Әкімшілік құқық бұзушылық туралы кодекстің 434-бабының 1-бөлігі («Ұсақ бұзақылық») бойынша кінәлі деп танылды.

Сот мәліметінше, оқиға 2026 жылғы 28 қазанда сағат 21:00 шамасында елордадағы жанармай құю станцияларының бірінде болған. Азамат И. өзі басқарған Toyota Camry көлігіне айналасындағыларға анық көрінетін балағат сөздер жазылған жазуды орналастырған. Автокөліктің видеосы Instagram желісіндегі Zhaloby.Astana парақшасында жарияланып, қоғамның теріс реакциясын тудырды.

Сот жүргізушінің әрекетін айналасындағыларға құрметсіздік танытып, қоғамдық тәртіпті бұзу деп бағалады. Оның кінәсі әкімшілік хаттама мен іс материалдары арқылы дәлелденген. Қаулы шығарған кезде сот құқық бұзушылықтың сипаты мен азаматтың мінез-құлқын ескерген.

ӘҚБтК-нің 434-бабының 1-бөлігі бойынша 20 АЕК мөлшерінде айыппұл немесе 5-тен 10 тәулікке дейін әкімшілік қамаққа алу жазасы қарастырылған. Сот азамат И.-ге 10 тәулікке әкімшілік қамақ тағайындады. Қаулы әзірге заңды күшіне енген жоқ.