Азия чемпионы 1 млн теңге сыйлық алды
Бокстан Азия чемпионы Наталья Богдановаға туған жерінде құрмет көрсетілді
Жақында Тайландта өткен Азия чемпионатында жеңімпаз атанған бұрымды былғары қолғап шеберін Солтүстік Қазақстан облысының әкімі Ғауез Нұрмұхамбетов қабылдады, деп хабарлайды Azattyq Rýhy.
«Финалда біздің спортшы турнир қожайынын сенімді жеңіп, Азия құрлығында үздік атанды. Бұл – үлкен еңбек, тәртіп пен жеңіске деген ерік-жігердің жарқын дәлелі. Өткен жылы Наталья Қытайда өткен Азия ойындарында қола медаль алған», – деді әкім.
Ғауез Нұрмұхамбетов боксшыға 1 млн теңгенің сертификатын беріп, бапкері Дастан Кабденовке бірлескен жұмыс пен спорттық жетістіктері үшін алғыс айтып, оған 500 мың теңге табыстады.
«Мемлекет спортшыларға әрдайым қолдау көрсетуде. Өңірде спорт инфрақұрылымы дамып жатыр. Былтыр 4 спорт кешені, 3 жабық хоккей корты, 23 шағын футбол алаңы салынды. Қазір 1 спорт кешені, 2 хоккей корты мен жабық жүзу бассейнінің құрылысы жалғасуда», – деді кездесу соңында Солтүстік Қазақстан облысының әкімі.
