Рыбакина бастаған теннисшілер Қазақстанды әлемдік додада жартылай финалға шығарды

Автралияда өтіп жатқан  United Cup-2025 турнирінде теннистен Қазақстан құрамасы жартылай финалға шықты. Бұл жарыстың жалпы жүлде қоры 11 170 000 АҚШ долларын құрайды, деп хабарлайды Azattyq Rýhy.

2025 жыл Қазақстан теннисшілері үшін сәтті басталды. Алдымен әлемдік рейтингте 6-сатыда тұрған Елена Рыбакина Германия командасының өкілі Лаура Зигемундпен кездесіп, 6:3, 6:1 есебімен жеңіске жетті. Ізінше Александр Шевченко неміс Даниэль Мазурды 6:7, 6:2, 6:2 нәтижесімен ұтты.

2-0 есебімен алға шыққан отандастарымыз үшін үшінші ойын – командалық микстің нәтижесі маңызды емес еді. Бұл сында Жібек Құламбаева мен Дмитрий Попко барын салып ойнамаған сыңайлы. Екі сетке созылған ойын Лаура Зигемунд пен Тим Пюцтің пайдасына 6-2, 6-2 есебімен аяқталды. Германия бұл жарыстың өткен жылғы чемпионы екенін айта кеткен жөн.

«Барлықтарыңызды Жаңа жылмен құттықтаймын! Мен кортта өзімді жақсы сезіндім. Физикалық тұрғыдан алғанда ұзақ сапар болды. Маусымның басы болғандықтан оңай болған жоқ, бірақ өз ойыныма көңілім толады.  Командалық сынға қатысып жатқаныма қуаныштымын. Мұндай мүмкіндік көп бола бермейді», –  деді ойыннан кейін Елена Рыбакина.

Елена Рыбакина 2024-ші жылы Парижде өткен Олимпиада ойындарына қатысудан бас тартқаны үшін қазақстандық жанкүйерлердің сынына қалған болатын. Спортшының өзі жарақат алғанын айтып ақталған еді.