Олимпиадаға қатыспаған теннисші Путинцева Цинциннати турнирінің жартылай финалына шықты

Париж Олимпиадасына барып тұрып, тізесінің жарақатына байланысты жарыс жолына шықпаған Юлия Путинцева канадалық Лейла Фернандеспен дуэтте Цинциннати турнирінің жартылай финалына екі разрядта шықты, деп хабарлайды Azattyq Rýhy.

Ширек финалда Путинцева мен Фернандес америкалық-чехиялық тандем Тейлор Таунсендпен және Катерина Синяковамен сынға түсті. Есеп: 2:6, 6:1, 10:6. 

Цинциннатиде өткен жұптық турнирдің финалына шығу үшін Путинцева мен Фернандес енді Елена Носковамен (Чехия) және Диана Шнайдермен (Ресей) күш сынасады.

Айта кетейік, Юлия Путинцева Париж Олимпиадасында украиналық Марта Костюкпен болатын матч алдындағы дайындықта тізесін ауыртып, жарыс жолына шығудан бас тартқан болатын.