Еуро-2024: Қазақстан құрамасы Сан-Мариноны жеңді

Футболдан 2024 жылғы Еуропа чемпионатына іріктеу сатысы жетінші турындағы Қазақстан құрамасының Сан-Мариноға қарсы ойыны аяқталды. Ойында 3:1 есебімен Қазақстан құрамасы жеңді. Осылайша Қазақстан Еуропа чемпионатына шығу үшін ойынды жалғастырады, деп хабарлайды Azattyq Rýhy.

Ойынның алғашқы таймында Қазақстан құрамасының ойыншысы Ислам Чесноков есеп ашты. Екінші таймда да Чесноков қарсыластарын қақпасын дәл көздеп, есепті еселеді. Артынша қарсылас команданың мүшесі Франчози Симоне бір гол салып, есепті 2:1-ге жеткізді. Одан кейін пенальти тепкен қазақстандық футболшы Абат Айымбетов есепті 3:1-ге жеткізді.

Бүгінгі ойында бас бапкер Магомед Адиев ойынның алғашқы минутынан Шацкий, Қайыров, Малый, Марочкин, Быстров, Досмағамбетов, Чесноков, Бейсебеков, Зуев, Оразов, Айымбетовке сенім артты.

Капитандық міндетті Абзал Бейсебеков атқарды.

Бүгінгі ойынды тамашалау үшін «Астана-арена» стадионына 30100 жанкүйер жиналды.

Ал Сан-Марино құрамасы сапында алғашқы минуттан Бенедеттини, Този, Росси, Ди Майо, Фабри, Баттистини, Лаццари, Муларони, Капиккьони, Голинуччи, Нанни жасыл алаңға шықты.

Айта кетейік, қазақстандық футболшылар құрлықтық дода іріктеу сатысындағы алғашқы ойында Сан-Мариноны сырт алаңда 3:0 есебімен жеңген болатын.