Жас теннисшілер әлем чемпионаты іріктеу кезеңінің ширек финалына шықты

Үндістанның Нью-Дели қаласында теннистен Қазақстан жасөспірімдер құрамасы Davis Cup кубогы іріктеу кезеңінің ширек финалына шықты, деп хабарлайды Azattyq Rýhy Қазақстан теннис федерациясына сілтеме жасап.

Жарыстың екінші күні қазақстандық жасөспірімдер Вьетнам құрамасын 2:1 есебімен ұтты.

Бірінші ойында Әмір Омарханов қарсыласына еш мүмкіндік қалдырған жоқ – 6:0, 6:0. Тартысты өрбіген екінші матчта Данир Қалдыбеков те үмітті ақтады – 2:6, 6:2, 6:3. Ештеңені шешпейтін үшінші бәсекеде Ә.Омарханов пен Виталий Зацепин ұтылып қалды.

 Ертең қазақстандықтар D тобындағы соңғы матчын Таиландпен өткізеді. Ширек финал жеребесі 13 сәуір күні кешкісін тартылады.